رد: خش عرفنا بنفسك
السلام عليكم ياحبايب الشيخ محمد صديق المنشاوي
كريم مصطفي عبد السلام
25 سنه
ليسانس تربيه تعليم اساسي مواد اجتماعية
محافظة ومدينة الفيوم
من صغري ووالدي بيشغل دايما اذاعة القرآن الكريم وكل الشيوخ كنت بسمعها لكن مكنتش اعرف اسم كل شيء وطبعا للأسف في سن الشباب وكده كنت بهتم بالاغاني شوية لحد ما فوقت علي نداء بيقولي ان الاغاني دي ملهاش اي لزمه وطالما ربنا رزقني بفلوس وشاتريت موبايل فيه مساحه ميموري ليه محطش عليه قرآن وكان عندي علي الكمبيوتر بتاع الشغل قرآن كتير جدا لشيوخ كتير اوي مصريين وخليج وقولت انا هسمع واحد واحد واللي يعجبني هحطله قرآن علي موبايلي والله اذد واحد جذبني كان الشيخ المنشاوي الله يرحمه وكنت فاكر كانت سورة الملك من المصحف المرتل
وطبعا الشيخ المفضل في الترتيل او التجويد هو الشيخ المنشاوي وعلي فكره في رأيي ان أحسن شيخ رتل القرآن هو المنشاوي لأنه استخدم فيه ذكائه بشده ومقرأهوش قراءة عاديه انما كان بيقرأه أكنه بيفسر وبكل روعه لدرجة اني بحب اسمع سورة طه منه اوي عشان اسمع منه قصة سيدنا موسي اكنه بيشرحلي وهو بيجزأ كلامه في الايات بحس انه بيكلمني وبيشرحلي وكمان هو في التجويد كان مجود راقي محترم واسلوبه خاشع بيخليني اعيش مع كل اياه وبياخدني لعالم الآخره لما بسمع آيات بتتكلم عن الآخره والآيات الخاشعه بخشع معاه
وعلي فكره انا برضه بحب كل الشيوخ المصريين وامبارح كنت عايز اسمع شيخ آخر بس حسيت اني محتاج اسمع آية الكرسي من الشيخ المنشاوي فشغلت سورة البقرة وجريت لحد موصلت للآيه ومقدرتش اقفل واشغل حد غيره من جمال الخشوع روحت سايب بقية السورة شغاله
وعلي فكره انا اشتريت كارت ميموري للموبايل بتاعي مساجته كبيرة مخصوص عشان احط المصحف المرتل كامل والمصحف المجود كامل للشيخ
ربنا يرحمه ويتقبل منه قرائته ويعفو عنا ويجمعنا معاه ومع الأبرار ومع الرسول الكريم يوم القيامه ان شاء الله
وبالنسبه للكوره انا مش بحبها ولا متابعها احاينا بحس انها مضيعة للوقت انا عارف انها رياضة بس اللي بيمارس الرياضه غير اللي بيتفرج عليها
وشكرا للموضوع الرائع ده والواحد فعلا كان محتاج يفضفض
