مصر هي الصحيان بدري و الشمس لسة بتفتح عنيها
و النور بيتسرسب من الشيش و اذاعة القران الكريم طالعة من الراديو ..
هي عربية الفول اللي الناس ملمومين عليها و بياكلو بمزاج قوي في احلى اصطباحة ،
و كبايه الشاي بالحليب على قهوه بلدي الساعه 7 الصبح .
و الواد اللي سايق عجلة وشايل طاولة العيش السخن
اللي لسة طالع من الفرن وريحته بتلعب في نخاشيشك ..
وعم سعيد بيفتح الدكان و بيرش ميه قدامه وبرضه اذاعة القران الكريم شغاله عنده
و "في بقعة من بقاع الارض طاهرة"
والبنت ام مريله كحلي اللي تشفوها وهي رايحة المدرسة
و العيال الصغيره اللي شنطة المدرسه قاطمه ضهرهم وهم متكتفين جوا المريله البني ام زراير من ورا ( بقوا يلبسوا قمصان دلوقتي )
وبرضه بيجروا ورا بعض و عاملين دوشه و تحية العلم .
مصر هي الاتنين الشباب الاصحاب قوي اللي ماشين ع الكورنيش في عز الشتا
ومستخبيين جوه الهدوم التقيله و بقهم بيطلع بخار م السقعة
بس واحد فيهم مطلع ايده م الجاكت و ماسك السيجارة .
مصر هي الرجاله الكبار اللي قعدين يفتكروا ايام زمان الحلوة
ويضحكوا ضحكه ترج النجم على راى الابنودي
و ام امين بتاعة الخضار الى قاعدة ع الناصيه من و انا في ابتدائي .
و الشارع الفاضي بالليل اللي مية الشتا بتلمع عليه
و عسكري المرور الواقف ف الشارع من زمان قوي .
مصر هي كل البيوت اللي فتحة على بعضها و بتحب بعضها من غير مصلحة .
كل فرح عديت عليه ودخلت باركت و انت مش عارف اسم العريس
و كل عزا دخلته وعملت الواجب فيه مع انك عمرك ما شوفت اللي مات .
مصر هي كبايه الشاي بالنعناع و انت لابس الجلبيه الصيفي و قاعد في البلكونه
مع نسمه بتهفهف بعد ما اكلت اكله محشي من ايد الوالدة و بنفسها
وحليت بشقتين بطيخ ساقعين في عز الصيف .
مصر سيد درويش وشد الحزام على وسطك و ام كلثوم بالليل وعبد الحليم لما تحب
و منيب و ام العيال العشرية و منير وهو بيصرخ
( يا مصر و انتي الحبيبه .. انتي اغترابي و شقايا
وانتي الجراح الرهيبه .. و انتي الي عندك دوايا )
مصر هي (( مولاي اني ببابك قد بسط يدي )) الي عايش بيها النقشبندي لحد دلوقتي
وصوت محمد رفعت بيقرا قبل الفطار ف رمضان
و الشيخ الشعراوي اللي بتزعل اول ميقول ( و الى لقاء قادم ان شاء الله )
مصر الابنودي وصلاح جاهين و فؤاد نجم و الشيخ امام
و فاروق جويده و هيكل و فهمي هويدى و الشيخ الغزالي فى صلاة العيد
و كل الناس الي بتصلي ورا محمد جبريل في دعوة الحق
ومصطفى بكرى ف الاسبوع و كاركتير احمد رجب .
مصر و ريحة الكبدة و امك بتعملها عشان تفطر اول يوم العيد بعد م تخلص دبح .
و الصيادين الي واقفين على البحر صيف شتا بيصيدوا السمك ..
و سواق التاكسى اللي بتركب معاه وبيحكيلك عن مشكله
مع انك عمرك مشفته قبل كدة ولا هاتشوفه بعد كده
و الواد علي اللي بيعدي عم جرجس الشارع وهو خايف عليه من العربيات
و الست الي بتفاصل مع بتاع الخضار علي شلن زياده في الطماطم
مصر السفر و السهر و الشقا و العشق و المعشوق
هي دى مصر و اللي ما شفهاش كده و ماشفش فيها كل ده ممكن ميحبهاش
بس اللي شاف ده و محبهاش لازم يراجع نفسه
ينسى الناس اللي تاعباه و تاعبه البلد و يفتكر البلد نفسها
البلد الي منير قلها
وحب اغترابي ف صبحك و ليلك .... وحب الونس بالرفاقة يا مصر
تنام الدموع ف العيون الهواجع .... تسهر دموعي ف حبك يا مصر
تهون الظنون و الشجون و المواجع ... اكدب ظنوني في حبك يا مصر
ها قرب و اقرب و مش ممكن اهرب .... وتنزل دموعي على خدودي تشرب
تلاقي الرموش و الخدود و المباسم مراسم .... وصورتك عليهم يا مصر
[glint]
[/glint]
صباح الخير على الناس المرهقين من عناء الحياة
والدايرين في الساقية اللي منصوبة لهم من سبع الاف سنة ..
الناس اللي عايشة اليوم بيومه .
.كل أملها يعدي من غير اي خساير ..
مابتفكرش في بكره عشان ماتتقهرش... مابتفكرش في النهارده علشان ماتتنقطش ..
صباح الخير على ضحكة عالية في قهوة شايها مايتشربش ..
على شاب بيقوم لست كبيرة في الاتوبيس..
على كوباية شاي باللبن وحتة بقسماط بعد صلاة الفجر جنب السيدة نفيسة ..
على قهوة في الحسين مبيعديش عليهاحد ..
على سينما زحمة والضحك طالع من القلب للركب ..
على سور الأزبكية وكتبه المعتقة ..
على عربيات الكبده والسجق لحمة الفقير
وعربيات الدوم تفاح الفقير
وعربيات التمر خمرة الفقير..
على اطباق الكشري خالي العدس وشطه زياده وغرقان في الدقة .
على كل صالة فى بيت مصرى بتلم الناس اللي مش عارفة تتلم على نفسها ..
على كل نكته وحشه تتقال بصوت عالي .
صباح الخير على الناس اللي واقفة في طابور حكومة رخم بتتخانق عشان تسلي بعضها ..
على مدرجات الدرجه التالتة وناسها اللي مش هنا اساسا ..
صباح الخير على كل ايدين بتسلم عليك باهتمام بعد الصلاة..
وعلى كل امام ما بيطولش في الوقوف ويطول في السجود ..
. على بتوع الزلابية اللي واقفين قدام المدارس خايفين من البلدية ...
صباح الخير على الناس اللي بتكوي قمصانها وتبص على المراية قبل ماتنزل ..
على شوارع الزمالك وجاردن سيتي والمعادي اللي تشرف وتفتح النفس للحياة
وعلى كل اللي بيمشوا فيها وبيفرحوا للي ساكنين فيها ....
صباح الخير على حب الجامعة ومظاهرات الجامعة وكل إفيه اتقال على اي معيد غتت في اي سكشن ...
صباح الخير على الاوض اللي فوق السطوح والشقق المفروشة والايجار اللي مابيدفعش ..
على صينية الاكل اللي بتيجي لك من الجيران قبل ما يتفقوا معاك تدي ابنهم درس...
على قرآن الفجر وصوت النقشبندي وهو بيقول مولاي اني ببابك قد بسطت يدي ...
صباح الخير على الجمعيات اللي ساتره الشعب المصري ..
على تمييلة الصاحب على صاحبه في ساعة الزنقة ..
...صباح الخير على كل نجع وكفر مايكفرش من العيشة ..
صباح الخير على الكنايس اللي شكلها حلو ,,
على الاتوبيس النهري لما يكون نضيف..
على عم دويدار ونصبة الكشري بتاعةالكوبري ..
على كل زوجه مابتنكدش على جوزها ,
وكل راجل مابيستقواش على ولية
وعلى كل ندهة لبابا وكل لعبة لبنوته ومسدس ميه لحماده ..
. صباح الخير على كراتين الجهاز المتعانة فوق الدواليب ..
[glow=CCFFFF]
صباح الخير على دعوة ربنا يكفيك شر طريقك ..
[/glow]
ياترى حد يعرف يرسم الصورة دى
ولا تيجوا ندخل فى كادر الصورة عشان نتصور مع مصر
يلا نتصور واضحك عشان الصورة تطلع حلوة
