خير اللهم اجعله خير....
حلمت إن "العفريت" بتاع مصباح علاء الدين طلع لي
ماتضحكوش،
أنا بتكلم بجد مش هزار
كان شكله "عثولة" أوى، حجمه أقل ولونه أزرق بيلمع ،تقريباً حاطط جليتر
من غير ما أدعك المصباح ولا حاجه لقيته طلعلى من نفسه وبيقول كالعادة
" شُبيكِ لُبيكِ عـ....."
لحقته قبل ما يكمل وقلت له
"حرام يا ابنى العبوديه اتلغت من زمان"
فهو قال لى " نعمل إيه بقى اتعودنا على الكلمة، عموماً تطلبى إيه؟؟
أى حاجه تتمنيها هحققها لك ومش تلات أمنيات بس، دول كتييييير خالص بس إنتِ أشري ولا حتى احلمي"
يااااه، ده أنا هعيش حياتى طلبات
فكرت كدا شويه وهرشت فى شعرى وفضلت افكر وافكر ثم اخذت افكر وافكر
لحد ما زهقت وقلت اقعد عالأرض علشان افكر برواقه
ولقيتنى مش عاوزه أطلب منه حاجه ولا على بالى أى أمنيه عاوزاه يحققها لى
أخيراً قلتله :"الصراحه مش عاوزه حاجه والحمد لله، كتر خيرك"
وقف يتنطط زى العفريت- وزى ليه ما هو فعلاً عفريت- وزعل خالص وكان قرب يعيط
وفضل يترجانى يا حرام علشان أطلب منه أى حاجه مهما كانت صعبه
وأنا اقوله والله مش عاوزه، صدقنى مش عاوزه، لحد ما سبته ومشيت،
وهو يجرى ورايا وشويه ألاقيه على يمينى وبعدين على شمالى وشويه قدام وشويه ورا..
خبلنى ولخبطنى وكان هيوقعنى
مزعج أوى
آخر ما زهقت صحيت من النوم علشان أهرب منه، شويه كدا ورجعت أنام تانى،
لقيته برضه "قاعد لى" على الأرض وحاطط خده على ايده وشكله زعلان أوى
أول ما شافنى جرى علىَّ فكرنى غيرت رأيى، بس اتصدم لما لقانى على موقفى
المهم....اتفقنا إنى أروح أسأل بابا وماما يمكن يكونوا عاوزين حاجه
صحيت من النوم تانى وسمعت صوت ماما فى المطبخ بتفطر بابا قبل ما ينزل للشغل،
فضلت مغمضه نص تغميضه علشان ما أفوقش أوى واعرف انام تانى
طبعاً اذبهلوا لما لقيونى صاحيه 7 الصبح وكمان يوم أجازتى
والصدمه الأكبر إنى صاحيه عالمطبخ مباشرةً مش على التليفزيون
واستقبلتنى ماما بجملتها :" خييييييييييييييير، صاحيه بدرى ليه؟؟ ولا يكنش عقلك وزك زى البنى آدمين وحسيتى بالجوع ومغمضه ليه؟؟"
أنا " لا مفيش.. بس حلمت بـ"بعفريت" مصباح علاء الدين وعاوزنى أطلب منه حاجات وانا معنديش حاجه اطلبها، قلت أسألكم يمكن تكونوا محتاجين حاجه"
طبعاً مستحيل تتخيلوا علامات "الذهول والصدمه" على وشهم وبابا وماما بيبصوا لبعض واللقمه واقفه فى ايد بابا معلقه فى المسافه بين بؤه والطبق
بابا فاق الأول وقالى :" بسم الله الرحمن الرحيم، دا هزار ولا جد؟"
" يعنى هصحى من النوم مخصوص علشان أهزر معاكو؟؟ بجد طبعاً"
وردت ماما:" مستنيه إيه ييجى فى الحلم لواحده بتتفرج على سبيس تون وإم بى سى ثرى؟؟
أكيد دا من أثار متابعتك لمغامرات علاء الدين كل يوم قبل ما تنزلى الشغل، إهدى بالله وارجعى كملى نومك"
- " يا ماما والله بتكلم جد، وصحيت ونمت وهو بردو مستنينى، ريحونى وريحوه واطلبوا حاجه علشان ينصرف"
- رد بابا " أعوذُ بالله، الله الغنى عنهم، سوا كرتون أو حقيقى، ربنا بيقول " وأنه كان رجالُ من الإنس يعوذون برجالٍ من الجن فزادوهم رهقاً"
وبعدين هنعوز منه إيه يعنى؟؟ ما إحنا كدا مبسوطين والحمد لله"
- " والله يا بابا عندك حق، بس نشوف ماما كدا يمكن عاوزاه يعملها حاجه ان شا الله حتى يجيب طلبات البيت من برا ولا ينضف لها البيت أهو يساعدها"
- " لا يا ستى، ربنا يغنينى عن المساعده العفاريتى دى، سيدنا محمد بيقول :" إذا سألت فسأل الله وإذا استعنت فاستعن بالله" خليه يشوف حد عبيط غيرنا
- " طب اعمل ايه دلوقت؟؟ ما هو مش هيهنينى على نومه"
- " روحى بس وهتلاقيه زهق ومشى، اقرى قرآن وهو ينصرف "
على مضض سِمِعت الكلام وانا ماشيه ابرطم مع نفسى
وسمعت ماما بتدينى ملحوظه بتريقه عالماشى كده " آه، وتبقى اتغطى كويس"
قصدها ايه الست دى؟؟ منه لله العفريت إللى جاب لى الكلام والتريقه ناوياله نيه سوده لو مامشيش
رجعت أوضتى وحطيت المخده فوق راسى يمكن اعرف أنام، والحمد لله نمت
ييييييييييييييييييييه، لسه قاعد نفس القعده، الصراحه شكله يصعب عالواحد، بس اعمل ايه؟؟ ما أنا مش عاوزه منه حاجه، هو بالعافيه يعنى
يادوب شافنى وجرى علىَّ وهو فرحان، عنده أمل المسكين، بس لما قرا ملامح وشى استنتج ان مفيش فايده
وقف يدبدب برجليه فى الأرض وبقى دخان وبعدين رجع إتكون تانى وقال بنرفزه
- " مش معقول يعنى عندكوا كل اللى تتمنوه، حتى لو عندكوا..كل الناس بتعوز زياده ، زياده فلوس وبيوت وعربيات ودهب وأراضى وأملاك، إنتِ عارفه فى كام واحد بيتمنانى فى الدنيا دى، وحظى ميجيش إلا فيكى وفى أهلك"
- -" يا عم إنت زعلان ليه، روح شوف غيرنا"
" ما إنتِ عارفه القاعده، لو ما اتمنيتيش حاجه أنا هتحرق وانتهى من الدنيا"
" [/COLOR]يكون أحسن برضه ، انت عايش من كتير أوى وكفايه عليك كده مزهقتش من عيلاء وياسمينا؟ روح ارتاح وان شاء الله تدخل الجنه علشان شكلك عفريت طيب وغلبان"
- " طب قوليلى مش عاوزه تطلبى حاجه منى ليه؟ بجد معندكيش أمنيات؟؟"
- " أقولك الصراحه..مفيش حد فى الدنيا معندهوش أحلام وأمنيات، حتى الزاهدين والرهبان أكيد بيتمنوا حاجات، وأنا زى الناس، بحلم وبتمنى بس بينى وبينك ومن غير زعل أنا "مضمنكش" ولازم أفكر كويس قبل ما اطلب اى حاجه؛
افرض اتمنيت فلوس وجبتها لى، مش جايز تكون سارقها او مزيفها او بتاعة غسيل أموال ولا مخدرات ولا حد كاسبها من حرام ومش فارقه معاه
ولو اخدت منها ولقاها نقصت يعمل حرام تانى علشان يكسب تانى، او تكون بتاعة حد محتاجها بجد وتعبان وشقيان فيها؟؟ يبقى ليه آخد فلوس فيها شُبهة حرام؟؟"
ساكت ليه؟؟
- طب اجيب لك بيت أو عربيه أو اى حاجه تانيه حتى لو بتحبى حد هجيبهولك لحد عندك؟؟
- يا سلاااام يا خويا، افرض بنيت لى بيت مخالف وجت المحافظه هدته، ولا قعدتنى فى بيت حد وطردته منه، وكمان انا بحب بيتنا ده غير ان البيت اللى بحلم بيه موجود فى الواقع بس صاحبه مش عاوز يبيعه ولا انا معايا فلوسه، انا كده مبسوطه والحمد لله
أما بقى حكاية المساعدات العاطفيه دى فدى أكتر حاجه مستحيل اطلبها منك ولا من غيرك انه يساعدنى فيها، الحًب والمشاعر لو مجتش من الشخص بكامل رضاه وإرادته يبقى مش عاوزاها، مش ممكن نتسول أو نسرق الحب والإهتمام من حوالينا، نصيبى هاخده حتى لو تحت الأرض أو فى بطن حوت
" إنتِ بجد قنوعه كده ولا بتمثلى علىَّ؟؟"
- " والله العظيم عاوزه وبتمنى حاجات كتييييييييييير أوى، لى ولناس بحبهم ولناس ما أعرفهمش ،بس مينفعش أطلبها منك؛ اللى بييجى سهل بيروح سهل، وبعدين اللذه غالباً بتكون فى مراحل حصولك على الشئ وذكرياتك وتعبك معاه وبعدين لما بييجى بتعامله انه عادى ومش فارق كتير، بتسعى علشان اللى بعده.
دى مش قناعه أكتر ما هى "عدم اقتناع بيك" إنت ممكن أوى ماتحققليش الحاجه زى ما بتمناها بالظبط، مش هتهتم بالتفاصيل
،زى الشغاله بتنضف وترتب وبردو تفضل ست البيت وراها تعيد على إللى بتعمله
،كل واحد أدرى بإللى هو عاوزه ومحتاجه بالظبط، أنا ههتم إنى أرضى نفسى وأرضى ربى فى إللى بتمناه وعاوزاه.
وكمان أنا اتعودت أدعى " اللهم حقق لنا مما يرضيك آمالنا" مش يحققلى إللى تقدر عليه يا سى عفريت
العفريت قرب يعيط يا حرام، بجد صعبان علىَّ، حاولت أصالحه وأطبط عليه بس إتقمَص وعمل زعلان
- " طب بُص، صدقنى بجد بجد لو حسيت إنى نفسى فى حاجه هطلبها منك"
- " طب قولى أى حاجه دلوقت ربنا يخليكى"
- " عندك بطيخ؟؟ بس يكون أحمر وريحته حلوه وطعمه لذيذ ومن غير هرمونات ومش صينى"
- " لااااااااااا، إنتِ متعمده تصعبيها علىَّ، هى فى حاجه من غير هرمونات او مش صينى دلوقت؟؟!!"
- " هات إللى تجيبه وخلصنى، الناس بتنام علشان ترتاح وأنا بنام علشان أوجع دماغى؟؟ أحلف ما عدت انام تانى علشان أخلص منك؟؟ ارحمنى وهات اى حاجه وخلصنى"
الحمد لله، خلصت منه، جابلى البطيخه وخليته غسلها وقطعها بالمره...وأهى طلبات وخلاص
خلى السهل عليه والصعب علينا....
ربنا يرضيكم ويرضينا ويحقق لكم كل أمانيكم وأحلامكم فى غير معصيه يا رب ومن غير عفريت
لا عفريت إنس ولا جن ولا عفريت مسابقات محمول ولا تليفزيون ولا بنوك ولا جرايد
أتمنى تكونوا فهمتوا قصدى
حلمك إنت إللى هتحققه
ربنا يغنيكم ويغنينا بالحلال ياااا رب
[/COLOR]
بقولكم إيه....حد له أى طلبات أو أمنيات عاوزها من العفريت؟؟
