السلام عليكم ورحمة الله وبركاته
كريم مصطفي 25 سنه من محافظة الفيوم
محدش يقدر يتخيل انا قد ايه بحب وبحترم وببجل الشيخ محمد صديق المنشاوي ازاي
مينفعش يعدي عليا يوم واحد مسمعش فيه الشيخ محمد صديق المنشاوي بفضل الله
الشيخ ده من اكبر واجمل وأذكي الشيوخ ايوة الشيخ محمد كان ذكي جدا انا عمري ما شوفت شيخ ذكي ويستخدم ذكائه حتي في قراءة القرآن لأنه بيقف وقفات غريبه مش زي الوقفات المعتاده بيجبرني اني اخلي بالي من الكلام وبيجبرني اني افهم صوته بيفسر وبيوضح الكلام وكمان في حاجه بيخليني احفظ معاه غصب عني والله بجد بحفظ معاه الايات بسهوله لانه صوته بيرن في عقلي ومش بقدر انسي الايات ابدا
ده غير انه الشيخ اللي بجد تألق جدا جدا في المصحف المرتل . احنا في مصر بنحب دايما التلاوات والتجويد ونحب نسمع التجويد والتلاوات اوي عشان نستمع لحلاوة الصوت وامكانيات الصوت الجيد والشيخ محمد صديق المنشاوي طبعا صوته مش محتاج اتكلم عنه بس الغريب انه تألق في المصحف المرتل حتي المصحف الرمتل اللي قرائته سريعه هو كان ليه فيه لون جميل حلو تخليك برضه تستمتع بيه زيه زي المجود وكمان بيفسر الايات
انا لما بسمع سورة طه مرتله منه بحفظها وراه بحس انه بيحكيلي قصه
اقولكم انا زمان مكنتش مهتم بالشيوخ او القرآن انتوا عارفين بئه سن المراهقه والطيش والشباب لكن قررت اسمع قرآن واستفيد والحمد الله انه هداني فتحت كمبيوتر عليه يمكن اكتر من عشر قراء واسمع بدايه سورة لكل شيخ منهم عشان اللي يعجبني اخده اسمعه وسمعت كله وفي الاخر اخترت الشيخ محمد صديق المنشاوي وانا مكنتش اعرفه اوي يادوب اسمع ان في شيخ اسمه كده
وعشان كده برجو اني اكون صديق لأي حد من أقارب الشيخ محمد صديق االمنشاوي او من العائله او من محبي الشيخ
ياريت بجد هكون سعيد اوي حتي اعرف اكتر واكتر
وانا علي فكره عندي للشيخ محمد صديق المصحف المجود كامل والمرتل كامل وجميع جميع حفلاته نزلتها من هنا في الموقع ومن مواقع تانيه من كتر حبي ليه نزلتله كل حاجه هو وجميع الشيوخ الجميله
